VI
| 1 | sacra facit vates: sint ora faventia sacris, |
| 2 | et cadat ante meos icta iuvenca focos. |
| 3 | serta Philiteis certet Romana corymbis, |
| 4 | et Cyrenaeas urna ministret aquas. |
| 5 | costum molle date et blandi mihi turis honores, |
| 6 | terque focum circa laneus orbis eat. |
| 7 | spargite me lymphis, carmenque recentibus aris |
| 8 | tibia Mygdoniis libet eburna cadis. |
| 9 | ite procul fraudes, alio sint aere noxae: |
| 10 | pura novum vati laurea mollit iter. |
| 11 | Musa, Palatini referemus Apollinis aedem: |
| 12 | res est, Calliope, digna favore tuo. |
| 13 | Caesaris in nomen ducuntur carmina: Caesar |
| 14 | dum canitur, quaeso, Iuppiter ipse vaces! |
| 15 | est Phoebi fugiens Athamana ad litora portus, |
| 16 | qua sinus Ioniae murmura condit aquae, |
| 17 | Actia Iuleae pelagus monumenta carinae, |
| 18 | nautarum votis non operosa via. |
| 19 | huc mundi coiere manus: stetit aequore moles |
| 20 | pinea, nec remis aequa favebat avis. |
| 21 | altera classis erat Teucro damnata Quirino, |
| 22 | pilaque feminea turpiter acta manu: |
| 23 | hinc Augusta ratis plenis Iovis omine velis, |
| 24 | signaque iam Patriae vincere docta suae. |
| 25 | tandem aciem geminos Nereus lunarat in arcus, |
| 26 | armorum et radiis picta tremebat aqua, |
| 27 | cum Phoebus linquens stantem se vindice Delon |
| 28 | (nam tulit iratos mobilis una Notos) |
| 29 | astitit Augusti puppim super, et nova flamma |
| 30 | luxit in obliquam ter sinuata facem. |
| 31 | non ille attulerat crinis in colla solutos |
| 32 | aut testudineae carmen inerme lyrae, |
| 33 | sed quali aspexit Pelopeum Agamemnona vultu, |
| 34 | egessitque avidis Dorica castra rogis, |
| 35 | aut qualis flexos solvit Pythona per orbis |
| 36 | serpentem, imbelles quem timuere lyrae. |
| 37 | mox ait "o Longa mundi servator ab Alba, |
| 38 | Auguste, Hectoreis cognite maior avis, |
| 39 | vince mari: iam terra tua est: tibi militat arcus |
| 40 | et favet ex umeris hoc onus omne meis. |
| 41 | solve metu patriam, quae nunc te vindice freta |
| 42 | imposuit prorae publica vota tuae. |
| 43 | quam nisi defendes, murorum Romulus augur |
| 44 | ire Palatinas non bene vidit avis. |
| 45 | et nimium remis audent prope: turpe Latinis |
| 46 | principe te fluctus regia vela pati. |
| 47 | nec te, quod classis centenis remiget alis, |
| 48 | terreat: invito labitur illa mari: |
| 49 | quodque vehunt prorae Centaurica saxa minantis, |
| 50 | tigna cava et pictos experiere metus. |
| 51 | frangit et attollit vires in milite causa; |
| 52 | quae nisi iusta subest, excutit arma pudor. |
| 53 | tempus adest, committe ratis! ego temporis auctor |
| 54 | ducam laurigera Iulia rostra manu." |
| 55 | dixerat, et pharetrae pondus consumit in arcus: |
| 56 | proxima post arcus Caesaris hasta fuit. |
| 57 | vincit Roma fide Phoebi: dat femina poenas: |
| 58 | sceptra per Ionias fracta vehuntur aquas. |
| 59 | at pater Idalio miratur Caesar ab astro: |
| 60 | "sum deus; est nostri sanguinis ista fides." |
| 61 | prosequitur cantu Triton, omnesque marinae |
| 62 | plauserunt circa libera signa deae. |
| 63 | illa petit Nilum cumba male nixa fugaci, |
| 64 | hoc unum, iusso non moritura die. |
| 65 | di melius! quantus mulier foret una triumphus, |
| 66 | ductus erat per quas ante Iugurtha vias! |
| 67 | Actius hinc traxit Phoebus monumenta, quod eius |
| 68 | una decem vicit missa sagitta ratis. |
| 69 | bella satis cecini: citharam iam poscit Apollo |
| 70 | victor et ad placidos exuit arma choros. |
| 71 | candida nunc molli subeant convivia luco; |
| 72 | blanditiaeque fluant per mea colla rosae, |
| 73 | vinaque fundantur prelis elisa Falernis, |
| 74 | terque lavet nostras spica Cilissa comas. |
| 75 | ingenium positis irritet Musa poetis: |
| 76 | Bacche, soles Phoebo fertilis esse tuo. |
| 77 | ille paludosos memoret servire Sycambros, |
| 78 | Cepheam hic Meroen fuscaque regna canat, |
| 79 | hic referat sero confessum foedere Parthum: |
| 80 | "reddat signa Remi, mox dabit ipse sua: |
| 81 | sive aliquid pharetris Augustus parcet Eois, |
| 82 | differat in pueros ista tropaea suos. |
| 83 | gaude, Crasse, nigras si quid sapis inter harenas: |
| 84 | ire per Euphraten ad tua busta licet." |
| 85 | sic noctem patera, sic ducam carmine, donec |
| 86 | iniciat radios in mea vina dies! |